X إغلاق
X إغلاق

Please install Flashֲ® and turn on Javascript.

قضية نحفاوية:بدنا نحكي بالعامية بلكي بتوصل الرسالة-للمرة الثاني نطرح قضية تخريب الممتلكات العامة

09-10-2014 - 12:05 / حصاد نت

بعد ما نشرنا هاي القضية في تاريخ 14/9/2014 بعنوان "نحف: تخريب بعض المرافق العامة بالقرية وإلحاق أضرار...لماذا..؟" ، بنرجع نحكيها للمرة الثانية بالعامية بلكي بتوصل الرسالة لبعض الأشخاص الي هدفهم مش معروف شو هو... .

شفنا أن الأمور عم بتزيد...ليش يا أبن نحف...؟ شو ناقصك..؟ شو بتستفيد...؟ قلي شو صار الك بعد ما خربت هيك شي..؟ طلعت درجة..؟ أرتقيت..؟ فزت ؟ .

هاي الشغلات عم تكثر بالبلد وفش اشي سالم من الخراب ، حتى عمدان الكهرباء واشارات المرور الي هدفها تنظيم السير مش تخربطو يا ابن نحف..؟ لويش هيك..؟ لمين هاي الشغلات معمولة لأهل ساجور ولا كرمئيل..؟

ليش بس ننزل على كرمئيل بنحترم القانون هناك..؟ وما منسترجي نعمل شي..لأنو في عقاب.؟ في بوليس.؟ ولا لشو.؟ عنا مين بستفيد من المرافق العامة اهل كرمئيل صح..؟ 

هاي المرافق بتخدم الكل الي وألك لأهلي ولأهلك أبن عمي وأبن عمك...الأسلام ما علمنا هيك .

وبتخريبنا الها بزيد العبق على السلطة المحلية بأخراج اخرى ميزانية ع حساب شي ثاني...وهو اذا ما صلح المجلس شو بصير الناس تقول المجلس مقصر...صح...؟ بس بقولوش انو هاي الناس الي خربت هي السبب..!!

بكفي عاد مش مصلحتنا نخرب ع حالنا...لو في هدف واحد الواحد بسكت سيعتها. اما الأشي عم بزيد..وين الأهل تسأل عن ولادها...وين دور السلطة في العقاب؟؟؟ وين دور المدارس ؟ وين دور الجوامع..؟ في توعية هذا الجانب وتذويتو فينا وغرس قيم حب البلد...

احنا بحاجة نشتغل عحالنا بالأول قبل كل شي ، نحب بلدنا عشان تكون أحسن بلد، ونكون فخر للقرى المجاورة . صدق يا أبن نحف مصلحتنا وحدة بأنو نحافظ عبلدنا .

كل واحد يقعد مع حالو ويراجع نفسو بس ل-5 دقايق واذا لقيت سبب واحد مقنع ارجع وخرب كمان...!

وتوجهنا للشرطة الجماهيرية حول الموضوع : " نحن بصدد معاقبة أي مخالف وخارج عن القانون ، لكن حتى الآن لم يتوجه الينا أي مسؤول بدعوى قضائية او شكوى ، حتى نقوم بكافة الإجراءات اللازمة ، لكن اذا اصطدمنا بأي شيء عالفور سيكون هنالك حزم وصرم، وقد بدأنا بهذا الأمر وخصوصاً بمخالفة الخارجي عن قانون السير، فلن نتهاون مع أي طرف ". 

بالآخر لازم نبلش نشتغل عحالنا ويكون هناك مواقف صارمة وحازمة ، ويكون للسلطة دور فعال في وضع النقاط ع الحروف ، يكفي تهاونا ، بدنا الشي بدون محسوبيات لا أبن فلان ولا علان...في عقاب للمخالف ،وسؤال للي بخرب مين الي بخسر أبن ساجور.؟ ولا كرمئيل.؟ فكر فيها مليح قبل ما تعمل اي شي...انت تستطيع التغيير فكن في الصدارة.ونقطة.

أضف تعليق

التعليقات